ਪੱਕਾ ਮੋਰਚਾ: ਮੋਤੀ ਮਹਿਲ ਦੀ ਬਜਾਏ ਹੁਣ ਸਿੱਧੂ ਦੀ ਕੋਠੀ ਘੇਰਨਗੇ ਮੁਲਾਜ਼ਮ

ਪਟਿਆਲਾ: ਕੱਚੇ, ਠੇਕੇ ਅਤੇ ਮਾਣਭੱਤੇ ’ਤੇ ਕਾਰਜਸ਼ੀਲ ਮੁਲਾਜ਼ਮਾਂ ’ਤੇ ਆਧਾਰਤ ਸੂਬਾਈ ਮੋਰਚੇ ਵੱਲੋਂ ਕੱਚੇ ਮੁਲਾਜ਼ਮਾਂ ਦੀਆਂ ਸੇਵਾਵਾਂ ਰੈਗੂਲਰ ਕਰਵਾਉਣ ਅਤੇ ਮਾਣਭੱਤੇ ’ਤੇ ਆਧਾਰਤ ਮੁਲਾਜ਼ਮਾਂ ਲਈ ਘੱਟੋ-ਘੱਟ ਉਜਰਤ ਯਕੀਨੀ ਬਣਾਉਣ ਲਈ ਇੱਥੇ ਪੁੱਡਾ ਗਰਾਊਂਡ ’ਚ ਲਾਏ ਪੱਕੇ ਮੋਰਚੇ ਦੇ ਦੂਜੇ ਦਿਨ ਅੱਜ ਹਜ਼ਾਰਾਂ ਮੁਲਾਜ਼ਮਾਂ ਨੇ ਧਰਨਾ ਦੇ ਕੇ ਬੱਸ ਸਟੈਂਡ ਚੌਕ ਜਾਮ ਕੀਤਾ। ਤਿੰਨ ਰੋਜ਼ਾ ਧਰਨੇ ਦੇ ਅੰਤਲੇ ਦਿਨ ਸੋਮਵਾਰ ਨੂੰ ਭਾਵੇਂ ਕੈਪਟਨ ਅਮਰਿੰਦਰ ਸਿੰਘ ਦੇ ਮਹਿਲ ਦਾ ਘਿਰਾਓ ਕਰਨ ਦਾ ਪ੍ਰੋਗਰਾਮ ਸੀ ਪਰ ਹੁਣ ਉਹ ਮੁੱਖ ਮੰਤਰੀ ਨਹੀਂ ਰਹੇ ਜਿਸ ਕਰਕੇ ਮੋਤੀ ਮਹਿਲ ਦੇ ਘਿਰਾਓ ਦੀ ਬਜਾਏ, ਭਲਕੇ ਇਹ ਮੁਲਾਜ਼ਮ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਦੀ ਇੱਥੇ ਸਥਿਤ ਰਿਹਾਇਸ਼ ਦਾ ਘਿਰਾਓ ਕਰਨਗੇ। ਇਸ ਦੌਰਾਨ ਪੰਜਾਬ ਭਰ ਤੋਂ ਹੋਰ ਮੁਲਾਜ਼ਮ ਵੀ ਸ਼ਿਰਕਤ ਕਰਨਗੇ। ਇਹ ਐਲਾਨ ਵੀ ਕੀਤਾ ਕਿ ਭਵਿੱਖ ’ਚ ਉਹ ਮੋਤੀ ਮਹਿਲ ਦੀ ਬਜਾਏ ਨਵੇਂ ਬਣਨ ਵਾਲੇ ਮੁੱਖ ਮੰਤਰੀ ਦੇ ਘਰ ਦਾ ਹੀ ਘਿਰਾਓ ਕਰਨਗੇ। ਜਥੇਬੰਦੀ ਦੇ ਕਨਵੀਨਰਾਂ ਪਰਵੀਨ ਸ਼ਰਮਾ, ਬਲਵੀਰ ਸਿੰਘ ਸਿਵੀਆ, ਪਰਮਜੀਤ ਕੌਰ ਮਾਨ ਅਤੇ ਲਖਵਿੰਦਰ ਕੌਰ ਫਰੀਦਕੋਟ ਦੀ ਅਗਵਾਈ ਹੇਠ ਲਾਏ ਗਏ ਇਸ ਧਰਨੇ ’ਚ ਨਰਸਿੰਗ ਸਟਾਫ਼, ਮਿੱਡ-ਡੇਅ ਮੀਲ ਵਰਕਰ, ਆਸ਼ਾ ਵਰਕਰ, ਨਾਨ-ਟੀਚਿੰਗ ਸਟਾਫ਼ ਸਮੇਤ ਕੁਝ ਹੋਰਨਾਂ ਵਰਗਾਂ ਦੇ ਮੁਲਾਜ਼ਮ ਵੀ ਹਿੱਸਾ ਲੈ ਰਹੇ ਹਨ। ਕਨਵੀਨਰ ਪਰਵੀਨ ਸ਼ਰਮਾ ਦਾ ਕਹਿਣਾ ਸੀ ਕਿ ਕੱਚੇ ਮੁਲਾਜ਼ਮਾਂ ਨੂੰ ਪੱਕੇ ਕਰਨ ਅਤੇ ਮਾਣ ਭੱਤੇ ਵਾਲਿਆਂ ਨੂੰ ਘੱਟੋ-ਘੱਟ ਉਜਰਤ ਯਕੀਨੀ ਬਣਾਉਣ ਦੀਆਂ ਦੋ ਹੀ ਮੰਗਾਂ ਹਨ। ਇਨ੍ਹਾਂ ਦੀ ਪੂਰਤੀ ਲਈ ਪਟਿਆਲਾ ’ਚ ਇਹ ਤਿੰਨ ਰੋਜ਼ਾ ਧਰਨਾ ਇਸ ਕਰਕੇ ਸ਼ੁਰੂ ਕੀਤਾ ਗਿਆ ਸੀ, ਕਿਉਂਕਿ ਇਹ ਮੁੱਖ ਮੰਤਰੀ ਦਾ ਸ਼ਹਿਰ ਹੈ ਪਰ ਹੁਣ ਤਾਂ ਅਮਰਿੰਦਰ ਸਿੰਘ ਮੁੱਖ ਮੰੰਤਰੀ ਹੀ ਨਹੀਂ ਰਹੇ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਕਾਂਗਰਸ ’ਚ ਚੱਲ ਰਹੀ ਕੁਰਸੀ ਦੀ ਇਸ ਲੜਾਈ ਨੇ ਮੁਲਾਜ਼ਮਾਂ ਸਮੇਤ ਹੋਰਨਾ ਵਰਗਾਂ ਦੀਆਂ ਮੰਗਾਂ ਦੀ ਪੂਰਤੀ ਦਾ ਮਾਮਲਾ ਵੀ ਵਿਚਕਾਰ ਹੀ ਰੋਲ਼ ਕੇ ਰੱਖ ਦਿੱਤਾ ਹੈ। ਆਗੂਆਂ ਦਾ ਇਹ ਵੀ ਕਹਿਣਾ ਸੀ ਕਿ ਮੁਲਾਜ਼ਮਾਂ ਸਮੇਤ ਹੋਰ ਅਨੇਕਾਂ ਵਰਗਾਂ ਨਾਲ਼ ਦਗਾ ਕਰਨ ਕਰਕੇ ਹੀ ਅਮਰਿੰਦਰ ਸਿੰਘ ਦੀ ਮਾੜੀ ਦੁਰਦਸ਼ਾ ਹੋਈ ਹੈ। ਇਸੇ ਕਰਕੇ ਜੇਕਰ ਮੁੱਖ ਮੰਤਰੀ ਦੀ ਕੁਰਸੀ ’ਤੇ ਬੈਠਣ ਵਾਲ਼ੇ ਅਗਲੇ ਸ਼ਖਸ ਨੇ ਵੀ ਮੁਲਾਜ਼ਮਾਂ ਅਤੇ ਹੋਰ ਮਜ਼ਲੂਮਾਂ ਦੀਆਂ ਮੰਗਾਂ ਨੂੰ ਨਜ਼ਰਅੰਦਾਜ਼ ਕੀਤਾ ਤਾਂ ਉਸ ਨੂੰ ਵੀ ਇਸੇ ਤਰ੍ਹਾਂ ਦਾ ਖਮਿਆਜ਼ਾ ਭੁਗਤਣਾ ਪਵੇਗਾ। ਅੱਜ ਦੇ ਧਰਨੇ ਨੂੰ ਕਲਜੀਤ ਕੌਰ, ਜਸਵਿੰਦਰ ਕੌਰ, ਕਿਰਨ ਕੁਮਾਰੀ , ਰਛਪਾਲ ਜੋਧਾਨਗਰੀ, ਅਮਰਜੀਤ ਕੰਮੇਆਣਾ, ਮਮਤਾ, ਪ੍ਰਵੀਨ , ਸ਼ਕੁੰਤਲਾ, ਜਤਿੰਦਰ, ਸੰਜੂ ਅਤੇ ਮਨਦੀਪ ਆਦਿ ਨੇ ਵੀ ਸੰਬੋਧਨ ਕੀਤਾ।

Leave a Reply

Your email address will not be published. Required fields are marked *