ਡਾਟਾ ਕਨੈਕਸ਼ਨ ਤੋਂ ਬਿਨਾਂ ਲਾਈਵ ਟੀ.ਵੀ. ਚੈਨਲਾਂ ਲਈ ‘ਡਾਇਰੈਕਟ-ਟੂ-ਮੋਬਾਈਲ’ ਤਕਨਾਲੋਜੀ ‘ਤੇ ਕੰਮ ਕਰ ਰਿਹਾ ਕੇਂਦਰ: ਰੀਪੋਰਟ

ਸਰਕਾਰ ਲਾਈਵ ਟੀ.ਵੀ. ਚੈਨਲਾਂ ਨੂੰ ਸਿੱਧਾ ਮੋਬਾਈਲ ਫੋਨਾਂ ‘ਤੇ ਲਿਆਉਣ ਦਾ ਇਕ ਨਵਾਂ ਤਰੀਕਾ ਲੱਭ ਰਹੀ ਹੈ, ਜੋ ਕਿ ਡਾਇਰੈਕਟ-ਟੂ-ਹੋਮ (ਡੀ.ਟੀ.ਐਚ.) ਸੇਵਾਵਾਂ ਵਾਂਗ ਹੀ ਕੰਮ ਕਰੇਗਾ। ਡਾਇਰੈਕਟ-ਟੂ-ਮੋਬਾਈਲ (D2M) ਨਾਮਕ ਤਕਨੀਕ ਦਾ ਉਦੇਸ਼ ਉਪਭੋਗਤਾਵਾਂ ਨੂੰ ਡਾਟਾ ਕਨੈਕਸ਼ਨ ਦੀ ਲੋੜ ਤੋਂ ਬਿਨਾਂ ਅਪਣੇ ਮੋਬਾਈਲ ‘ਤੇ ਟੀ.ਵੀ. ਦੇਖਣ ਦੇ ਯੋਗ ਬਣਾਉਣਾ ਹੈ।

5 ਅਗੱਸਤ ਦੀ ਇਕ ਰੀਪੋਰਟ ਵਿਚ ਸਰਕਾਰੀ ਸੂਤਰਾਂ ਦਾ ਹਵਾਲਾ ਦਿੰਦੇ ਹੋਏ ਖੁਲਾਸਾ ਕੀਤਾ ਗਿਆ ਹੈ ਕਿ ਦੂਰਸੰਚਾਰ ਵਿਭਾਗ (DoT), ਸੂਚਨਾ ਅਤੇ ਪ੍ਰਸਾਰਣ ਮੰਤਰਾਲਾ (MIB) ਅਤੇ IIT-ਕਾਨਪੁਰ ਪਹਿਲਕਦਮੀ ਵਿਚ ਸਹਿਯੋਗ ਕਰ ਰਹੇ ਹਨ। ਹਾਲਾਂਕਿ ਇਹ ਵਿਚਾਰ ਸੰਭਾਵਤ ਹੈ, ਟੈਲੀਕਾਮ ਆਪਰੇਟਰ ਡਾਟਾ ਮਾਲੀਏ ਦੇ ਸੰਭਾਵੀ ਨੁਕਸਾਨ ਦੀ ਚਿੰਤਾ ਦੇ ਕਾਰਨ ਇਸ ਦਾ ਵਿਰੋਧ ਕਰ ਸਕਦੇ ਹਨ।

ਉਹਨਾਂ ਦਾ ਮਾਲੀਆ ਜ਼ਿਆਦਾਤਰ ਵੀਡੀਉ ਦੀ ਖਪਤ ‘ਤੇ ਨਿਰਭਰ ਕਰਦਾ ਹੈ, ਅਤੇ ਇਹ ਡੀ.2ਐਮ. ਪਹੁੰਚ ਉਨ੍ਹਾਂ ਦੀਆਂ 5ਜੀ ਵਪਾਰਕ ਰਣਨੀਤੀਆਂ ਨੂੰ ਪ੍ਰਭਾਵਤ ਕਰ ਸਕਦੀ ਹੈ। ਇਕ ਅਧਿਕਾਰੀ ਨੇ ਨਾਂਅ ਗੁਪਤ ਰੱਖਣ ਦੀ ਸ਼ਰਤ ‘ਤੇ ਕਿਹਾ, “ਅਸੀਂ ਸੰਭਾਵਨਾ ਦੀ ਜਾਂਚ ਕਰ ਰਹੇ ਹਾਂ, ਅਤੇ ਅੰਤਮ ਫੈਸਲੇ ਵਿਚ ਟੈਲੀਕਾਮ ਆਪਰੇਟਰਾਂ ਸਮੇਤ ਸਾਰੇ ਹਿੱਸੇਦਾਰਾਂ ਨਾਲ ਵਿਚਾਰ-ਵਟਾਂਦਰਾ ਕੀਤਾ ਜਾਵੇਗਾ।”