ਕੌਲਿਜੀਅਮ ਨੇ ਜਸਟਿਸ ਸੁਧੀਰ ਸਿੰਘ ਨੂੰ ਪੰਜਾਬ-ਹਰਿਆਣਾ ਹਾਈ ਕੋਰਟ ਵਿਚ ਤਬਦੀਲ ਕਰਨ ਦੀ ਸਿਫ਼ਾਰਸ਼ ਦੁਹਰਾਈ

ਨਵੀਂ ਦਿੱਲੀ:  ਚੀਫ ਜਸਟਿਸ ਡੀ.ਵਾਈ. ਚੰਦਰਚੂੜ ਦੀ ਅਗਵਾਈ ਵਾਲੇ ਸੁਪਰੀਮ ਕੋਰਟ ਦੇ ਕੌਲਿਜੀਅਮ ਨੇ ਜਸਟਿਸ ਸੁਧੀਰ ਸਿੰਘ ਨੂੰ ਪਟਨਾ ਹਾਈ ਕੋਰਟ ਤੋਂ ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਵਿਚ ਤਬਦੀਲ ਕਰਨ ਦੀ ਆਪਣੀ ਸਿਫ਼ਾਰਸ਼ ਦੁਹਰਾਈ। ਜਸਟਿਸ ਸਿੰਘ ਦੇ ਤਬਾਦਲੇ ਦਾ ਪ੍ਰਸਤਾਵ ਕਾਲਜੀਅਮ ਨੇ 3 ਅਗਸਤ ਨੂੰ “ਬਿਹਤਰ ਨਿਆਂਇਕ ਪ੍ਰਸ਼ਾਸਨ” ਲਈ ਰੱਖਿਆ ਸੀ।

ਕੌਲਿਜੀਅਮ ਵਿਚ ਜਸਟਿਸ ਸੰਜੇ ਕਿਸ਼ਨ ਕੌਲ, ਜਸਟਿਸ ਸੰਜੀਵ ਖੰਨਾ, ਜਸਟਿਸ ਬੀਆਰ ਗਵਈ ਅਤੇ ਜਸਟਿਸ ਸੂਰਿਆ ਕਾਂਤ ਵੀ ਸ਼ਾਮਲ ਹਨ। ਇਸ ਨੇ ਆਪਣੀ 10 ਅਗਸਤ ਦੀ ਮੀਟਿੰਗ ਵਿਚ ਜਸਟਿਸ ਸਿੰਘ ਦੀ 8 ਅਗਸਤ ਦੀ ਪ੍ਰਤੀਨਿਧਤਾ ਬਾਰੇ ਵਿਚਾਰ ਕੀਤਾ ਸੀ। ਇਕ ਮਤੇ ਵਿਚ ਕਿਹਾ ਗਿਆ ਹੈ ਕਿ “ਉਨ੍ਹਾਂ (ਜਸਟਿਸ ਸਿੰਘ) ਨੇ ਉਕਤ ਨੁਮਾਇੰਦਗੀ ਵਿਚ ਬੇਨਤੀ ਕੀਤੀ ਹੈ ਕਿ ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਵਿਚ ਉਨ੍ਹਾਂ ਦੇ ਤਬਾਦਲੇ ਬਾਰੇ ਅੰਤਿਮ ਫੈਸਲਾ ਲੈਣ ਤੋਂ ਪਹਿਲਾਂ ਉਨ੍ਹਾਂ ਦੇ ਪੱਤਰ ਵਿਚ ਪੇਸ਼ ਤੱਥਾਂ ‘ਤੇ ਵਿਚਾਰ ਕੀਤਾ ਜਾਵੇ।

ਮਤੇ ਵਿਚ ਕਿਹਾ ਗਿਆ ਹੈ ਕਿ “ਅਸੀਂ ਪਟਨਾ ਹਾਈ ਕੋਰਟ ਅਤੇ ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਦੇ ਮੁੱਖ ਜੱਜਾਂ ਨਾਲ ਵੀ ਸਲਾਹ ਕੀਤੀ ਹੈ।”
ਇਸ ਵਿਚ ਕਿਹਾ ਗਿਆ ਹੈ ਕਿ “ਉਪਰੋਕਤ ਦੇ ਮੱਦੇਨਜ਼ਰ, ਕੌਲਿਜੀਅਮ ਨੇ ਉਸ (ਜਸਟਿਸ ਸਿੰਘ) ਨੂੰ ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਵਿਚ ਤਬਦੀਲ ਕਰਨ ਲਈ 3 ਅਗਸਤ, 2023 ਦੀ ਆਪਣੀ ਸਿਫਾਰਸ਼ ਨੂੰ ਦੁਹਰਾਉਣ ਦਾ ਸੰਕਲਪ ਲਿਆ ਹੈ।