ਬਿਹਾਰ: ਸੜਕ ਹਾਦਸੇ ਦੌਰਾਨ ਇਕੋ ਪ੍ਰਵਾਰ ਦੇ 7 ਜੀਆਂ ਦੀ ਮੌਤ

ਪਟਨਾ: ਬਿਹਾਰ ਦੇ ਰੋਹਤਾਸ ਜ਼ਿਲ੍ਹੇ ਵਿਚ ਬੁਧਵਾਰ ਤੜਕੇ ਇਕ ਐਸ.ਯੂ.ਵੀ. ਦੇ ਸੜਕ ਕਿਨਾਰੇ ਖੜ੍ਹੇ ਟਰਾਲੇ ਨਾਲ ਟਕਰਾ ਜਾਣ ਕਾਰਨ ਇਕ ਹੀ ਪ੍ਰਵਾਰ ਦੇ ਸੱਤ ਜੀਆਂ ਦੀ ਮੌਤ ਹੋ ਗਈ ਅਤੇ ਪੰਜ ਹੋਰ ਜ਼ਖ਼ਮੀ ਹੋ ਗਏ । ਦਸਿਆ ਜਾ ਰਿਹਾ ਹੈ ਕਿ ਇਹ ਹਾਦਸਾ ਡਰਾਈਵਰ ਨੂੰ ਨੀਂਦ ਆਉਣ ਕਾਰਨ ਵਾਪਰਿਆ ਹੈ।

ਸ਼ਿਵਸਾਗਰ ਥਾਣਾ ਮੁਖੀ ਰਾਕੇਸ਼ ਗੋਸਾਈ ਨੇ ਦਸਿਆ, “ਮ੍ਰਿਤਕਾਂ ਦੀਆਂ ਲਾਸ਼ਾਂ ਨੂੰ ਪੋਸਟਮਾਰਟਮ ਲਈ ਹਸਪਤਾਲ ਭੇਜ ਦਿਤਾ ਗਿਆ ਹੈ। ਪੁਲਿਸ ਨੇ ਹਾਦਸਾਗ੍ਰਸਤ ਦੋਵੇਂ ਵਾਹਨਾਂ ਨੂੰ ਕਬਜ਼ੇ ‘ਚ ਲੈ ਲਿਆ ਹੈ।” ਉਨ੍ਹਾਂ ਦਸਿਆ ਕਿ ਇਹ ਹਾਦਸਾ ਰੋਹਤਾਸ ਜ਼ਿਲ੍ਹਾ ਹੈੱਡਕੁਆਰਟਰ ਸਾਸਾਰਾਮ ਦੇ ਸ਼ਿਵਸਾਗਰ ਇਲਾਕੇ ‘ਚ ਨੈਸ਼ਨਲ ਹਾਈਵੇਅ 2 ‘ਤੇ ਸਵੇਰੇ ਕਰੀਬ 4 ਵਜੇ ਵਾਪਰਿਆ।

ਬਿਹਾਰ ਦੇ ਕੈਮੂਰ ਜ਼ਿਲ੍ਹੇ ਦੇ ਵਸਨੀਕ ਉਕਤ ਪ੍ਰਵਾਰ ਦੇ ਮੈਂਬਰ ਐਸ.ਯੂ.ਵੀ. ‘ਤੇ ਸਵਾਰ ਹੋ ਕੇ ਗੁਆਂਢੀ ਰਾਜ ਝਾਰਖੰਡ ਦੇ ਰਾਜਰੱਪਾ ਮੰਦਰ ਤੋਂ ਵਾਪਸ ਆ ਰਹੇ ਸਨ। ਐਸ.ਯੂ.ਵੀ. ਵਿਚ ਡਰਾਈਵਰ ਤੋਂ ਇਲਾਵਾ 11 ਹੋਰ ਲੋਕ ਸਵਾਰ ਸਨ। ਪੁਲਿਸ ਨੇ ਖ਼ਦਸ਼ਾ ਜ਼ਾਹਰ ਕੀਤਾ ਹੈ ਕਿ ਤੇਜ਼ ਰਫ਼ਤਾਰ ਕਾਰਨ ਡਰਾਈਵਰ ਗੱਡੀ ਤੋਂ ਕੰਟਰੋਲ ਗੁਆ ਬੈਠਾ।

ਮ੍ਰਿਤਕਾਂ ਦੀ ਪਛਾਣ ਰਾਜਮਤੀ ਦੇਵੀ (55), ਉਸ ਦੀ ਬੇਟੀ ਸੋਨੀ ਕੁਮਾਰੀ (35), ਉਸ ਦੇ ਜਵਾਈ ਅਰਵਿੰਦ ਸ਼ਰਮਾ (40), ਉਸ ਦੇ ਪੋਤੇ ਆਦਿਤਿਆ ਕੁਮਾਰ (8) ਅਤੇ ਰੀਆ ਕੁਮਾਰੀ (9) ਵਜੋਂ ਹੋਈ ਹੈ। ਗੋਸਾਈ ਨੇ ਦਸਿਆ ਕਿ ਹਾਦਸੇ ਵਿਚ ਅਰਵਿੰਦ ਦੀਆਂ ਦੋ ਭਤੀਜੀਆਂ ਤਾਰਾ ਕੁਮਾਰੀ (22) ਅਤੇ ਚਾਂਦਨੀ ਕੁਮਾਰੀ (15) ਦੀ ਵੀ ਮੌਤ ਹੋ ਗਈ। ਉਨ੍ਹਾਂ ਦਸਿਆ ਕਿ ਇਸ ਹਾਦਸੇ ਵਿਚ ਜ਼ਖ਼ਮੀ ਹੋਏ ਵਿਅਕਤੀਆਂ ਨੂੰ ਇਲਾਜ ਲਈ ਨੇੜਲੇ ਹਸਪਤਾਲ ਵਿਚ ਦਾਖ਼ਲ ਕਰਵਾਇਆ ਗਿਆ ਹੈ।