ਬੁਸ਼ਫਾਇਰ ਦਾ ਖਤਰਾ! ਆਸਟ੍ਰੇਲੀਆ ‘ਚ 6 ਮਹੀਨਿਆਂ ਲਈ ਚੇਤਾਵਨੀ ਜਾਰੀ

ਕੈਨਬਰਾ: ਆਸਟ੍ਰੇਲੀਆ ਵਿਚ ਇਸ ਸਮੇਂ ਬੁਸ਼ਫਾਇਰ ਦਾ ਖਤਰਾ ਮੰਡਰਾ ਰਿਹਾ ਹੈ। ਇਸ ਦੇ ਤਹਿਤ ਅਧਿਕਾਰੀਆਂ ਨੇ ਫਰਵਰੀ 2024 ਦੇ ਅੰਤ ਤੱਕ ਪੂਰੇ ਆਸਟ੍ਰੇਲੀਆ ਦੇ ਉੱਤਰੀ ਖੇਤਰ (ਐਨਟੀ) ਨੂੰ ਅੱਗ ਦੇ ਖ਼ਤਰੇ ਵਾਲਾ ਖੇਤਰ ਘੋਸ਼ਿਤ ਕੀਤਾ ਹੈ। ਸਮਾਚਾਰ ਏਜੰਸੀ ਸ਼ਿਨਹੂਆ ਦੀ ਰਿਪੋਰਟ ਮੁਤਾਬਕ ਸ਼ੁੱਕਰਵਾਰ ਨੂੰ ਇੱਕ ਮੀਟਿੰਗ ਤੋਂ ਬਾਅਦ ਬੁਸ਼ਫਾਇਰਜ਼ NT ਅਤੇ NT ਫਾਇਰ ਐਂਡ ਰੈਸਕਿਊ ਸਰਵਿਸ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਸਾਰੇ ਖੇਤਰ- 1.4 ਮਿਲੀਅਨ ਵਰਗ ਕਿਲੋਮੀਟਰ ਤੋਂ ਵੱਧ ਦੇ ਖੇਤਰ ਨੂੰ ਸ਼ਨੀਵਾਰ ਤੋਂ 29 ਫਰਵਰੀ, 2024 ਤੱਕ ਅੱਗ ਦੇ ਖਤਰੇ ਦਾ ਖੇਤਰ ਮੰਨਿਆ ਜਾਵੇਗਾ।

ਬੁਸ਼ਫਾਇਰਜ਼ ਐਨ.ਟੀ ਦੇ ਮੁੱਖ ਫਾਇਰ ਕੰਟਰੋਲ ਅਫਸਰ ਟੋਨੀ ਫੁਲਰ ਨੇ ਕਿਹਾ ਕਿ ਔਸਤ ਤੋਂ ਵੱਧ ਤਾਪਮਾਨ ਦੀ ਭਵਿੱਖਬਾਣੀ ਨੇ ਪੂਰੇ ਖੇਤਰ ਵਿੱਚ ਭਿਆਨਕ ਅੱਗ ਦੇ ਖਤਰੇ ਵਿੱਚ ਮਹੱਤਵਪੂਰਨ ਵਾਧਾ ਕੀਤਾ ਹੈ। ਉਸ ਨੇ ਬਿਆਨ ਵਿੱਚ ਕਿਹਾ ਕਿ “2011-12 ਦੇ ਸੀਜ਼ਨ ਦੌਰਾਨ ਜੰਗਲ ਦੀ ਅੱਗ ਨਾਲ 80 ਪ੍ਰਤੀਸ਼ਤ ਖੇਤਰ ਸੜ ਗਿਆ ਸੀ ਅਤੇ ਲਗਾਤਾਰ ਲਾ ਨੀਨਾ ਸਾਲਾਂ ਅਤੇ ਇਸ ਗਰਮੀਆਂ ਵਿੱਚ ਔਸਤ ਤਾਪਮਾਨ ਦੀ ਭਵਿੱਖਬਾਣੀ ਕਾਰਨ ਇਹ ਇਸ ਸੀਜ਼ਨ ਵਿੱਚ ਦੁਬਾਰਾ ਦੁਹਰਾ ਸਕਦਾ ਹੈ,”। NT ਬੁਸ਼ਫਾਇਰ ਮੈਨੇਜਮੈਂਟ ਐਕਟ ਦੇ ਤਹਿਤ ਘੋਸ਼ਿਤ ਅੱਗ ਦੇ ਖਤਰੇ ਵਾਲੇ ਖੇਤਰਾਂ ਵਿੱਚ ਸਾਰੇ ਜ਼ਮੀਨ ਮਾਲਕਾਂ ਨੂੰ ਅੱਗ ਲਗਾਉਣ ਲਈ ਪਰਮਿਟ ਲੈਣ ਦੀ ਲੋੜ ਹੁੰਦੀ ਹੈ। ਕੋਈ ਵੀ ਵਿਅਕਤੀ ਜੋ ਜਾਣਬੁੱਝ ਕੇ ਖ਼ਤਰੇ ਵਾਲੇ ਖੇਤਰ ਵਿੱਚ ਅਜਿਹਾ ਕਰਨ ਦੀ ਇਜਾਜ਼ਤ ਤੋਂ ਬਿਨਾਂ ਅੱਗ ਲਗਾਉਂਦਾ ਹੈ, ਤਾਂ ਉਸ ਨੂੰ ਵੱਧ ਤੋਂ ਵੱਧ ਪੰਜ ਸਾਲ ਦੀ ਕੈਦ ਦੀ ਸਜ਼ਾ ਹੋ ਸਕਦੀ ਹੈ।

ਇਹ ਘੋਸ਼ਣਾ ਉਦੋਂ ਕੀਤੀ ਗਈ ਜਦੋਂ ਸ਼ੁੱਕਰਵਾਰ ਨੂੰ NT ਦੇ ਕੇਂਦਰੀ ਬਾਰਕਲੀ ਖੇਤਰ ਵਿੱਚ 6,000 ਵਰਗ ਕਿਲੋਮੀਟਰ ਤੋਂ ਵੱਧ ਖੇਤਰ ਵਿੱਚ ਇੱਕ ਵੱਡੀ ਝਾੜੀਆਂ ਦੀ ਅੱਗ ਬੇਕਾਬੂ ਪਾਈ ਗਈ। ਐਨ.ਟੀ ਪੁਲਸ ਕਮਿਸ਼ਨਰ ਮਾਈਕਲ ਮਰਫੀ ਨੇ ਸ਼ੁੱਕਰਵਾਰ ਸਵੇਰੇ ਇੱਕ ਪ੍ਰੈਸ ਕਾਨਫਰੰਸ ਵਿੱਚ ਦੱਸਿਆ ਕਿ ਅੱਗ ਜ਼ਿੰਦਗੀ ਲਈ ਕੋਈ ਖ਼ਤਰਾ ਨਹੀਂ ਸੀ ਪਰ ਸਪਲਾਈ ਲਾਈਨਾਂ ਨੂੰ ਪ੍ਰਭਾਵਤ ਕਰ ਸਕਦੀ ਹੈ। ਉਸਨੇ ਪੁਸ਼ਟੀ ਕੀਤੀ ਕਿ ਅੱਗ ਦੇ ਜਵਾਬ ਵਿੱਚ ਇੱਕ ਟੈਰੀਟਰੀ ਐਮਰਜੈਂਸੀ ਮੈਨੇਜਮੈਂਟ ਕੌਂਸਲ (TEMC) ਨੂੰ ਸਰਗਰਮ ਕਰ ਦਿੱਤਾ ਗਿਆ ਹੈ। ਮਰਫੀ ਨੇ ਪੱਤਰਕਾਰਾਂ ਨੂੰ ਕਿਹਾ ਕਿ “ਇਹ ਖੇਤਰ ਵਿੱਚ ਭੋਜਨ ਅਤੇ ਸਪਲਾਈ ਲਾਈਨਾਂ ‘ਤੇ ਬਹੁਤ ਵੱਡਾ ਪ੍ਰਭਾਵ ਹੈ।