ਦਿੱਲੀ ਆਬਕਾਰੀ ਨੀਤੀ ਮਾਮਲਾ: BRS ਆਗੂ ਕਵਿਤਾ ਤੋਂ ਹੋਵੇਗੀ ਪੁੱਛਗਿੱਛ, 11 ਮਾਰਚ ਨੂੰ ED ਅੱਗੇ ਹੋਵੇਗੀ ਪੇਸ਼
ਨਵੀਂ ਦਿੱਲੀ: ਤੇਲੰਗਾਨਾ ਦੇ ਮੁੱਖ ਮੰਤਰੀ ਕੇ. ਚੰਦਰਸ਼ੇਖਰ ਰਾਓ ਦੀ ਧੀ ਕੇ. ਕਵਿਤਾ ਨੇ ਬੁੱਧਵਾਰ ਨੂੰ ਕਿਹਾ ਕਿ ਉਹ ਦਿੱਲੀ ਆਬਕਾਰੀ ਨੀਤੀ ਵਿਚ ਕਥਿਤ ਬੇਨਿਯਮੀਆਂ ਨਾਲ ਜੁੜੇ ਮਨੀ ਲਾਂਡਰਿੰਗ ਦੇ ਮਾਮਲੇ ਵਿਚ ਪੁੱਛਗਿੱਛ ਲਈ 11 ਮਾਰਚ ਨੂੰ ਈ.ਡੀ. ਅੱਗੇ ਪੇਸ਼ ਹੋਵੇਗੀ। ਭਾਰਤ ਰਾਸ਼ਟਰ ਸਮਿਤੀ (ਬੀ.ਆਰ.ਐੱਸ.) ਦੀ ਵਿਧਾਨ ਪ੍ਰੀਸ਼ਦ ਮੈਂਬਰ ਕਵਿਤਾ ਨੇ ਬੁੱਧਵਾਰ ਦੇਰ ਰਾਤ ਟਵੀਟ ਕੀਤਾ, “ਮੈਂ 11 ਮਾਰਚ, 2023 ਨੂੰ ਨਵੀਂ ਦਿੱਲ ਵਿਚ ਈ.ਡੀ. ਅੱਗੇ ਪੇਸ਼ ਹੋਵਾਂਗੀ।”
ਬੀ.ਆਰ.ਐੱਸ. ਆਗੂ ਕਵਿਤਾ ਨੇ ਕਿਹਾ ਕਿ ਉਹ ਜਾਂਚ ਏਜੰਸੀ ਨਾਲ ਪੂਰਾ ਸਹਿਯੋਗ ਕਰੇਗੀ। ਉਨ੍ਹਾਂ ਨੇ ਨਾਲ ਹੀ ਕਿਹਾ ਕਿ ਉਹ ਈ.ਡੀ. ਅੱਗੇ ਪੇਸ਼ ਹੋਣ ਨੂੰ ਲੈ ਕੇ ਕਾਨੂੰਨੀ ਰਾਏ ਲਵੇਗੀ ਕਿਉਂਕਿ ਉਨ੍ਹਾਂ ਦਾ 10 ਮਾਰਚ ਨੂੰ ਮਹਿਲਾ ਰਾਖਵਾਂਕਰਨ ਬਿੱਲ ਦੇ ਹੱਕ ਵਿਚ ਕੌਮੀ ਰਾਜਧਾਨੀ ਵਿਚ ਧਰਨਾ-ਪ੍ਰਦਰਸ਼ਨ ਦਾ ਪ੍ਰੋਗਰਾਮ ਹੈ। ਏਜੰਸੀ ਮੁਤਾਬਕ ਦੱਖਣੀ ਸਮੂਹ ਵਿਚ ਸ਼ਰਤ ਰੈੱਡੀ (ਅਰਵਿੰਦੋ ਫਾਰਮਾ), ਮਗੁੰਤਾ ਸ਼ੀਨਿਵਾਸਲੂ ਰੈੱਡੀ (ਵਾਈ.ਐੱਸ.ਆਰ. ਕਾਂਗਰਸ ਸੰਸਦ ਮੈਂਬਰ ਤੇ ਓਂਗੋਲ ਤੋਂ ਲੋਕਸਭਾ ਮੈਂਬਰ),ਕਵਿਤਾ ਤੇ ਹੋਰ ਸ਼ਾਮਲ ਹਨ। ਬੀ.ਆਰ.ਐੱਸ. ਆਗੂ ਤੋਂ ਇਸ ਤੋਂ ਪਹਿਲਾਂ ਸੀ.ਬੀ.ਆਈ. ਨੇ ਵੀ ਪੁੱਛਗਿੱਛ ਕੀਤੀ ਸੀ।
