ਪੰਜਾਬ ਪੁਲਸ ਦਾ ਟੈਕਨੀਕਲ ਵਿੰਗ ਪੂਰੀ ਸਮਰੱਥਾ ਦੇ ਨਾਲ ਇਸ ਗੱਲ ਦੀ ਭਾਲ ਕਰਨ ਵਿਚ ਲੱਗਾ ਹੋਇਆ ਹੈ ਕਿ ਆਖ਼ਰ ਵਿਦੇਸ਼ੀ ਆਈ.ਪੀ. ਐਡਰੈੱਸ ਤੋਂ ਅਪਲੋਡ ਹੋਣ ਤੋਂ ਬਾਅਦ ਸਰਕੁਲੇਟ ਹੋਈ ਉਕਤ ਵੀਡੀਓ ਆਖ਼ਰਕਾਰ ਉੱਥੇ ਤੱਕ ਕਿਸ ਰਸਤੇ ਤੋਂ ਪੁੱਜੀ ਹੈ। ਇਸ ਕੰਮ ਵਿਚ ਕੇਂਦਰੀ ਏਜੰਸੀਆਂ ਤੋਂ ਵੀ ਪੰਜਾਬ ਪੁਲਸ ਨੂੰ ਪੂਰਾ ਸਹਿਯੋਗ ਮਿਲ ਰਿਹਾ ਹੈ। ਵੀਡੀਓ ਭੇਜਣ ਦਾ ਲਿੰਕ ਪਤਾ ਲੱਗਦੇ ਹੀ ਇਹ ਵੀ ਖ਼ੁਲਾਸਾ ਹੋ ਜਾਵੇਗਾ ਕਿ ਆਖ਼ਰਕਾਰ ਇਹ ਵੀਡੀਓ ਰਿਕਾਰਡ ਕਿੱਥੇ ਹੋਈ ਅਤੇ ਭੇਜੀ ਕਿਸ ਡਿਵਾਇਸ ਨਾਲ ਗਈ।
ਓਧਰ, ਵੀਡੀਓ ਵਿਚ ਅੰਮ੍ਰਿਤਪਾਲ ਸਿੰਘ ਵਲੋਂ ਵਾਰ-ਵਾਰ ਸਰਬੱਤ ਖ਼ਾਲਸਾ ਲਈ ਦਬਾਅ ਬਣਾਏ ਜਾਣ ਕਾਰਣ ਸਿੱਖ ਸਿਆਸਤ ਵਿਚ ਹਲਚਲ ਮਚੀ ਹੋਈ ਹੈ ਕਿਉਂਕਿ ਹੁਣ ਸਾਰਿਆਂ ਦੀਆਂ ਨਜ਼ਰਾਂ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਜਥੇਦਾਰ ਗਿਆਨੀ ਹਰਪ੍ਰੀਤ ਸਿੰਘ ’ਤੇ ਟਿਕੀਆਂ ਹੋਈਆਂ ਹਨ ਕਿਉਂਕਿ ਉਨ੍ਹਾਂ ਵਲੋਂ ਲਿਆ ਜਾਣ ਵਾਲਾ ਫ਼ੈਸਲਾ ਭਵਿੱਖ ਦੀਆਂ ਕਈ ਚੀਜ਼ਾਂ ਨੂੰ ਪ੍ਰਭਾਵਿਤ ਕਰਨ ਵਾਲਾ ਸਾਬਿਤ ਹੋ ਸਕਦਾ ਹੈ।
ਅੰਮ੍ਰਿਤਪਾਲ ਸਿੰਘ ਦੇ ਪਿੱਛੇ ਲੱਗੀਆਂ ਹੋਈਆਂ ਪੰਜਾਬ ਪੁਲਸ ਦੀਆਂ ਟੀਮਾਂ ਵਲੋਂ ਦਾਅਵਾ ਕੀਤਾ ਗਿਆ ਹੈ ਕਿ ਉਤਰਾਖੰਡ ਤੋਂ ਪੰਜਾਬ ਦਾ ਸਫ਼ਰ ਕਰਨ ਵਿਚ ਇਸਤੇਮਾਲ ਹੋਈ ਗੱਡੀ ਵੀ ਬਰਾਮਦ ਹੋ ਚੁੱਕੀ ਹੈ ਕਈ ਇਲਾਕਿਆਂ ਵਿਚ ਪੰਜਾਬ ਪੁਲਸ ਦੀਆਂ ਟੀਮਾਂ ਵਲੋਂ ਤਲਾਸ਼ੀ ਅਭਿਆਨ ਲਈ ਡਰੋਨਜ਼ ਦਾ ਵੀ ਇਸਤੇਮਾਲ ਕੀਤਾ ਜਾ ਰਿਹਾ ਹੈ।
