ਮਧੂ ਮੱਖੀਆਂ ਤੋਂ ਬਚਣ ਲਈ ਨੌਜਵਾਨ ਨੇ ਹਸਪਤਾਲ ਦੀ ਤੀਜੀ ਮੰਜ਼ਿਲ ਤੋਂ ਮਾਰੀ ਛਾਲ, ਮੌਤ

ਖੰਡਵਾ: ਮੱਧ ਪ੍ਰਦੇਸ਼ ਦੇ ਖੰਡਵਾ ਤੋਂ ਦੁਖ਼ਦਾਈ ਖ਼ਬਰ ਸਾਹਮਣੇ ਆਈ ਹੈ। ਇਥੇ ਮਧੂ ਮੱਖੀਆਂ ਤੋਂ ਬਚਣ ਦੇ ਚੱਕਰਾਂ ‘ਚ ਨੌਜਵਾਨ ਨੇ ਤੀਜੀ ਮੰਜ਼ਿਲ ਤੋਂ ਛਾਲ ਮਾਰ ਦਿੱਤੀ। ਇਸ ਹਾਦਸੇ ‘ਚ ਨੌਜਵਾਨ ਦੀ ਦਰਦਨਾਕ ਮੌਤ ਹੋ ਗਈ। ਮ੍ਰਿਤਕ ਦੀ ਪਹਿਚਾਣ ਸਚਿਨ ਸੋਲੰਕੀ ਵਾਸੀ ਪਿੰਡ ਰਾਮਪੁਰਾ (ਸਿੰਗੋਟ) ਵਜੋਂ ਹੋਈ ਹੈ। ਜਾਣਕਾਰੀ ਅਨੁਸਾਰ ਮ੍ਰਿਤਕ ਦੀ ਪਤਨੀ ਛਾਇਆਬਾਈ ਨੂੰ ਜਣੇਪੇ ਲਈ ਜ਼ਿਲ੍ਹਾ ਹਸਪਤਾਲ ਵਿਚ ਦਾਖ਼ਲ ਕਰਵਾਇਆ ਗਿਆ ਸੀ।

ਸਚਿਨ ਦੇ ਸਾਲੇ ਰਾਜੇਸ਼ ਨੇ ਦੱਸਿਆ ਕਿ ਸੋਮਵਾਰ ਸਵੇਰੇ 4 ਵਜੇ ਮਧੂ ਮੱਖੀਆਂ ਉੱਡਣ ਲੱਗੀਆਂ। ਵਰਾਂਡੇ ਵਿਚ ਮੌਜੂਦ ਲੋਕ ਇਧਰ-ਉਧਰ ਭੱਜਣ ਲੱਗੇ। ਆਵਾਜ਼ ਸੁਣ ਕੇ ਸਚਿਨ ਨੀਂਦ ਤੋਂ ਜਾਗ ਗਿਆ ਅਤੇ ਭੱਜਣ ਲੱਗਾ। ਜਿਸ ਪਾਸੇ ਉਹ ਭੱਜਿਆ, ਛੱਤ ‘ਤੇ ਇਕ ਗੈਲਰੀ ਹੈ। ਇਸ ਗੈਲਰੀ ਦੇ ਨਾਲ ਲੱਗਦਾ ਇੱਕ ਮਧੂ ਮੱਖੀਆਂ ਦਾ ਛੱਤਾ ਹੈ। ਸਚਿਨ ਅਪਣੀ ਜਾਨ ਬਚਾਉਣ ਲਈ ਗੈਲਰੀ ‘ਤੇ ਚੜ੍ਹਿਆ ਅਤੇ ਹੇਠਾਂ ਛਾਲ ਮਾਰ ਦਿੱਤੀ। ਉਹ ਹਸਪਤਾਲ ਦੇ ਪਿਛਲੇ ਹਿੱਸੇ ਵਿਚ ਡਿੱਗ ਪਿਆ।