ਸ਼੍ਰੀਲੰਕਾ ਦੀ ਨੇਵੀ ਨੇ ਮੱਛੀਆਂ ਫੜਨ ਦੇ ਦੋਸ਼ ’ਚ 12 ਭਾਰਤੀ ਮਛੇਰਿਆਂ ਨੂੰ ਕੀਤਾ ਗ੍ਰਿਫ਼ਤਾਰ
ਕੋਲੰਬੋ : ਸ਼੍ਰੀਲੰਕਾ ਦੀ ਨੇਵੀ ਨੇ ਦੇਸ਼ ਦੇ ਸਮੁੰਦਰੀ ਇਲਾਕੇ ’ਚ ਗੈਰ-ਕਾਨੂੰਨੀ ਢੰਗ ਨਾਲ ਮੱਛੀਆਂ ਫੜਨ ਦੇ ਦੋਸ਼ ’ਚ 12 ਭਾਰਤੀ ਮਛੇਰਿਆਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਸ਼੍ਰੀਲੰਕਾ ਦੀ ਨੇਵੀ ਨੇ ਇਕ ਬਿਆਨ ’ਚ ਕਿਹਾ ਕਿ ਇਨ੍ਹਾਂ ਮਛੇਰਿਆਂ ਨੂੰ ਬੁੱਧਵਾਰ ਨੂੰ ਉੱਤਰੀ ਜ਼ਾਫਨਾ ਜ਼ਿਲੇ ’ਚ ਵੇਟੀਲਾਇਕੇਰਨੀ ਦੇ ਕੰਢਿਓਂ ਗ੍ਰਿਫ਼ਤਾਰ ਕੀਤਾ ਗਿਆ।
ਭਾਰਤ ਤੇ ਸ਼੍ਰੀਲੰਕਾ ਵਿਚਾਲੇ ਕਈ ਉੱਚ ਪੱਧਰੀ ਗੱਲਬਾਤ ਦੇ ਬਾਵਜੂਦ ਭਾਰਤੀ ਮਛੇਰਿਆਂ ਵਲੋਂ ਸ਼੍ਰੀਲੰਕਾ ਦੇ ਸਮੁੰਦਰੀ ਇਲਾਕੇ ’ਚ ਮੱਛੀਆਂ ਫੜਨਾ ਇਕ ਮੁਸ਼ਕਿਲ ਬਣਿਆ ਹੋਇਆ ਹੈ।
ਪਹਿਲਾਂਂ ਵੀ ਸ਼੍ਰੀਲੰਕਾ ਦੀ ਨੇਵੀ ਨੇ ਪਾਕਿ ਜਲਡਮਰੂਮੱਧ ’ਚ ਭਾਰਤੀ ਮਛੇਰਿਆਂ ’ਤੇ ਗੋਲੀਬਾਰੀ ਵੀ ਕੀਤੀ ਸੀ ਤੇ ਸ਼੍ਰੀਲੰਕਾ ਦੇ ਸਮੁੰਦਰੀ ਇਲਾਕੇ ’ਚ ਦਾਖ਼ਲੇ ਦੀਆਂ ਗੈਰ-ਕਾਨੂੰਨੀ ਘਟਨਾਵਾਂ ਦੇ ਦੋਸ਼ ’ਚ ਉਨ੍ਹਾਂ ਦੀਆਂ ਮੱਛੀਆਂ ਫੜਨ ਵਾਲੀਆਂ ਕਿਸ਼ਤੀਆਂ ਵੀ ਜ਼ਬਤ ਕਰ ਲਈਆਂ ਸਨ। ਪਾਕਿ ਜਲਡਮਰੂਮੱਧ ਇਕ ਸੰਕਰੀ ਪੱਟੀ ਹੈ, ਜੋ ਤਾਮਿਲਨਾਡੂ ਨੂੰ ਸ਼੍ਰੀਲੰਕਾ ਤੋਂ ਅਲੱਗ ਕਰਦੀ ਹੈ ਤੇ ਇਹ ਦੋਵਾਂ ਦੇਸ਼ਾਂ ਲਈ ਮੱਛੀਆਂ ਫੜਨ ਦੇ ਲਿਹਾਜ਼ ਨਾਲ ਇਕ ਬਿਹਤਰ ਸਥਾਨ ਹੈ।
