ਤਿੰਨ ਸਾਲਾਂ ’ਚ ਕਰਜ਼ ਮੁਕਤ ਹੋਵੇਗੀ ਬੀ.ਐਸ.ਐਨ.ਐਲ., ਕੈਬਨਿਟ ਨੇ 89,047 ਕਰੋੜ ਰੁਪਏ ਦੇ ਪੈਕੇਜ ਨੂੰ ਦਿਤੀ ਮਨਜ਼ੂਰੀ

ਨਵੀਂ ਦਿੱਲੀ: ਬੀ.ਐਸ.ਐਨ.ਐਲ. ਨੂੰ ਮਜ਼ਬੂਤ ​​ਕਰਨ ਅਤੇ ਇਸ ਨੂੰ ਪੂਰੀ ਤਰ੍ਹਾਂ ਕਰਜ਼ਾ ਮੁਕਤ ਬਣਾਉਣ ਲਈ ਕੈਬਨਿਟ ਨੇ 89,047 ਕਰੋੜ ਰੁਪਏ ਦੇ ਤੀਜੇ ਪੈਕੇਜ ਨੂੰ ਮਨਜ਼ੂਰੀ ਦਿਤੀ ਹੈ। ਇਸ ਤੋਂ ਪਹਿਲਾਂ ਦੋ ਵਾਰ ਸਾਲ 2019 ਅਤੇ ਸਾਲ 2022 ਵਿਚ ਬੀ.ਐਸ.ਐਨ.ਐਲ. ਦੀ ਮਜ਼ਬੂਤੀ ਲਈ ਪੈਕੇਜ ਨੂੰ ਮਨਜ਼ੂਰੀ ਦਿਤੀ ਜਾ ਚੁਕੀ ਹੈ। ਸਾਲ 2019 ਵਿਚ 69,000 ਕਰੋੜ ਰੁਪਏ ਅਤੇ ਸਾਲ 2022 ਵਿਚ 1.60 ਲੱਖ ਕਰੋੜ ਰੁਪਏ ਦੇ ਪੈਕੇਜ ਨੂੰ ਮਨਜ਼ੂਰੀ ਦਿਤੀ ਗਈ ਸੀ।

ਅਗਲੇ ਸਾਲ ਤਕ ਬੀ.ਐਸ.ਐਨ.ਐਲ. ਦੀਆਂ 4G ਅਤੇ 5G ਸੇਵਾਵਾਂ ਦਿੱਲੀ ਅਤੇ ਮੁੰਬਈ ਵਿਚ ਵੀ ਸ਼ੁਰੂ ਹੋ ਜਾਣਗੀਆਂ। 4ਜੀ ਅਤੇ 5ਜੀ ਦੇ ਨਾਲ, ਬੀ.ਐਸ.ਐਨ.ਐਲ. ਅਪਣੀ 2ਜੀ ਸੇਵਾ ਵੀ ਜਾਰੀ ਰਖੇਗੀ।  ਸੰਚਾਰ ਮੰਤਰੀ ਅਸ਼ਵਨੀ ਵੈਸ਼ਨਵ ਨੇ ਕਿਹਾ ਕਿ ਬੀ.ਐਸ.ਐਨ.ਐਲ. ਪਿਛਲੇ ਦੋ ਵਿੱਤੀ ਪੈਕੇਜਾਂ ਦੀ ਮਦਦ ਨਾਲ ਸੰਚਾਲਨ ਲਾਭ ਵਿਚ ਆਇਆ ਹੈ ਅਤੇ ਬੀ.ਐਸ.ਐਨ.ਐਲ. ਅਗਲੇ ਤਿੰਨ ਸਾਲਾਂ ਵਿਚ ਕਰਜ਼ਾ ਮੁਕਤ ਹੋ ਜਾਵੇਗਾ। ਇਸ ਸਮੇਂ ਬੀ.ਐਸ.ਐਨ.ਐਲ. ‘ਤੇ 22,289 ਕਰੋੜ ਰੁਪਏ ਦਾ ਕਰਜ਼ਾ ਹੈ। ਦੋ ਸਾਲ ਪਹਿਲਾਂ ਇਹ ਕਰਜ਼ਾ 32,944 ਕਰੋੜ ਰੁਪਏ ਸੀ। ਪਿਛਲੇ ਵਿੱਤੀ ਸਾਲ 2022-23 ਵਿਚ ਬੀ.ਐਸ.ਐਨ.ਐਲ. ਦਾ ਸੰਚਾਲਨ ਲਾਭ 1559 ਕਰੋੜ ਰੁਪਏ ਸੀ।