ਮੈਨੂੰ ਵੀ ਕਰਨਾ ਪਿਆ ਸੀ ਨਸਲਵਾਦ ਦਾ ਸਾਹਮਣਾ : ਬ੍ਰਿਟਿਸ਼ ਪ੍ਰਧਾਨ ਮੰਤਰੀ

ਲੰਡਨ:  ਬ੍ਰਿਟਿਸ਼ ਪ੍ਰਧਾਨ ਮੰਤਰੀ ਰਿਸ਼ੀ ਸੂਨਕ ਨੇ ਇਥੇ ਲਾਰਡਸ ਕ੍ਰਿਕੇਟ ਮੈਦਾਨ ’ਚ ਐਸ਼ੇਜ ਟੈਸਟ ਲੜੀ (ਇੰਗਲੈਂਡ ਬਨਾਮ ਆਸਟਰੇਲੀਆ) ਦੇ ਦੂਜੇ ਮੈਚ ਦੇ ਚੌਥੇ ਦਿਨ ਕਿਹਾ ਕਿ ਉਨ੍ਹਾਂ ਨੇ ਇਸ ਦੇਸ਼ ’ਚ ਵੱਡੇ ਹੋਣ ਦੌਰਾਨ ਨਸਲਵਾਦ ਦਾ ਸਾਹਮਣਾ ਕੀਤਾ ਸੀ।

43 ਵਰ੍ਹਿਆਂ ਦੇ ਇਸ ਕ੍ਰਿਕੇਟ ਪ੍ਰਸ਼ੰਸਕ ਨੇ ਬੀ.ਬੀ.ਸੀ. ਦੇ ਕ੍ਰਿਕੇਟ ਰੀਪੋਰਟ ਜੋਨਾਥਨ ਐਂਗਰਿਊ ਦੇ ਇਕ ਸਵਾਲ ਦੇ ਜਵਾਬ ’ਚ ਕਿਹਾ, ‘‘ਮੈਂ ਕ੍ਰਿਕੇਟ ’ਚ ਅਜਿਹਾ ਮਹਿਸੂਸ ਨਹੀਂ ਕੀਤਾ, ਪਰ ਯਕੀਨੀ ਤੌਰ ’ਤੇ ਮੈਂ ਵੱਡੇ ਹੁੰਦਿਆਂ ਨਸਲਵਾਦ ਦਾ ਸਾਹਮਣਾ ਕੀਤਾ ਹੈ।’’

ਉਨ੍ਹਾਂ ਅੱਗੇ ਕਿਹਾ, ‘‘ਇਹ ਤੁਹਾਨੂੰ ਗੰਭੀਰ ਤਰੀਕੇ ਨਾਲ ਪ੍ਰਭਾਵਤ ਕਰਦਾ ਹੈ। ਮੈਂ ਇਕ ਅਜਿਹੇ ਪੇਸ਼ੇ ’ਚੋਂ ਹਾਂ ਜਿੱਥੇ ਮੈਨੂੰ ਰੋਜ਼ ਹਰ ਘੰਟੇ ਹਰ ਮਿੰਟ ਆਲੋਚਨਾ ਦਾ ਸਾਹਮਣਾ ਕਰਨਾ ਪੈਂਦਾ ਹੈ ਪਰ ਨਸਲਵਾਦ ਤੁਹਾਨੂੰ ਕਾਫ਼ੀ ਗੰਭੀਰ ਤਰੀਕੇ ਨਾਲ ਪ੍ਰਭਾਵਤ ਕਰਦਾ ਹੈ। ਇਹ ਬਹੁਤ ਦੁਖ ਪਹੁੰਚਾਉਂਦਾ ਹੈ।’’

ਸੂਨਕ ਨੇ ਕਿਹਾ ਕਿ ‘ਇੰਡੀਪੈਂਡੈਂਟ ਕਮਿਸ਼ਨ ਫ਼ਾਰ ਇਕੁਇਟੀ ਇਨ ਕ੍ਰਿਕੇਟ (ਆਈ.ਸੀ.ਈ.ਸੀ.)’ ਦੀ ਰੀਪੋਰਟ ਉਨ੍ਹਾਂ ਵਰਗੇ ਕ੍ਰਿਕੇਟ ਪ੍ਰੇਮੀਆਂ ਲਈ ‘ਕਾਫ਼ੀ ਦਰਦਨਾਕ’ ਹੈ।

ਪਿਛਲੇ ਦਿਨੀਂ ਜਾਰੀ ਇਸ ਰੀਪੋਰਟ ’ਚ ਸਵਾਲਾਂ ਦਾ ਜਵਾਬ ਦੇਣ ਵਾਲੇ 50 ਫ਼ੀ ਸਦੀ ਵਿਅਕਤੀਆਂ ਨੇ ਦਸਿਆ ਕਿ ਪਿਛਲੇ ਪੰਜ ਸਾਲਾਂ ਦੌਰਾਨ ਉਨ੍ਹਾਂ ਨੂੰ ਨਸਲੀ ਵਿਤਕਰੇ ਦਾ ਸਾਹਮਣਾ ਕਰਨਾ ਪਿਆ। ਇਹ ਅੰਕੜਾ ਪਾਕਿਸਤਾਨੀ (87 ਫ਼ੀ ਸਦੀ), ਬੰਗਲਾਦੇਸ਼ੀ (82 ਫ਼ੀ ਸਦੀ) ਅਤੇ ਭਾਰਤੀ (75 ਫ਼ੀ ਸਦੀ) ਮੂਲ ਦੇ ਲੋਕਾਂ ’ਚ ਬਹੁਤ ਜ਼ਿਆਦਾ ਸੀ। ਰੀਪੋਰਟ ਦੇ ਨਿਚੋੜ ’ਚ ਕਿਹਾ ਗਿਆ ਸੀ ਕਿ ਕ੍ਰਿਕੇਟ ’ਚ ਨਸਲਵਾਦ ਡੂੰਘੀਆਂ ਜੜ੍ਹਾਂ ਜਮਾ ਚੁਕਿਆ ਹੈ। ਰੀਪੋਰਟ ’ਚ ਕਿਹਾ ਗਿਆ, ‘‘ਕ੍ਰਿਕੇਟ ’ਚ ਨਸਲਵਾਦ ਬਹੁਤ ਗੰਭੀਰ ਮੁੱਦਾ ਬਣ ਗਿਆ ਹੈ। ਇਸ ਨਾਲ ਕ੍ਰਿਕੇਟ ਖੇਡਣ ਵਾਲੇ ਕਈ ਲੋਕਾਂ ਦੇ ਤਜਰਬੇ ਅਤੇ ਉਨ੍ਹਾਂ ਨੂੰ ਮਿਲਣ ਵਾਲੇ ਮੌਕਿਆਂ ’ਤੇ ਅਸਰ ਪੈਂਦਾ ਹੈ।’’