ਨੂਹ ਹਿੰਸਾ ਯੋਜਨਾਬੱਧ ਸੀ, 2024 ਦੀਆਂ ਚੋਣਾਂ ਤੋਂ ਪਹਿਲਾਂ ਅਜਿਹੀਆਂ ਹੋਰ ਘਟਨਾਵਾਂ ਦੀ ਸੰਭਾਵਨਾ: ਸੱਤਿਆਪਾਲ ਮਲਿਕ

ਨਵੀਂ ਦਿੱਲੀ: ਜੰਮੂ-ਕਸ਼ਮੀਰ ਦੇ ਸਾਬਕਾ ਰਾਜਪਾਲ ਸੱਤਿਆਪਾਲ ਮਲਿਕ ਨੇ ਕਿਹਾ ਕਿ ਹਰਿਆਣਾ ਦੇ ਨੂਹ ਤੋਂ ਸ਼ੁਰੂ ਹੋ ਕੇ ਸੂਬੇ ਦੇ ਵੱਖ-ਵੱਖ ਹਿੱਸਿਆਂ ਵਿਚ ਫੈਲੀ ਹਿੰਸਾ ਅਚਾਨਕ ਨਹੀਂ ਵਾਪਰੀ। ਉਨ੍ਹਾਂ ਅਨੁਸਾਰ, ਸੱਤ ਤੋਂ ਅੱਠ ਵੱਖ-ਵੱਖ ਥਾਵਾਂ ‘ਤੇ ਹੋਏ ਹਮਲੇ ਫਿਰਕੂ ਵੰਡ ਪੈਦਾ ਕਰਨ ਦੇ ਉਦੇਸ਼ ਨਾਲ ਯੋਜਨਾਬੱਧ ਸਨ। ਦਿੱਲੀ ਦੇ ਕਾਂਸਟੀਚਿਊਸ਼ਨ ਕਲੱਬ ‘ਚ ਆਯੋਜਤ ਇਕ ਪ੍ਰੋਗਰਾਮ ‘ਚ ਉਨ੍ਹਾਂ ਕਿਹਾ, ‘ਜੇਕਰ ਇਨ੍ਹਾਂ ਲੋਕਾਂ ‘ਤੇ ਕਾਬੂ ਨਾ ਪਾਇਆ ਗਿਆ ਤਾਂ ਪੂਰਾ ਦੇਸ਼ ਮਨੀਪੁਰ ਵਾਂਗ ਸੜ ਜਾਵੇਗਾ। ਜਾਟ ਸੱਭਿਆਚਾਰ ਜਾਂ ਪਰੰਪਰਾ ਦੁਆਰਾ ਆਰਿਆ ਸਮਾਜ ਦੀ ਜੀਵਨ ਸ਼ੈਲੀ ਵਿਚ ਵਿਸ਼ਵਾਸ ਕਰਦੇ ਹਨ ਅਤੇ ਰਵਾਇਤੀ ਅਰਥਾਂ ਵਿਚ ਬਹੁਤ ਧਾਰਮਿਕ ਨਹੀਂ ਹਨ। ਨਾ ਹੀ ਇਸ ਖੇਤਰ ਦੇ ਮੁਸਲਮਾਨਾਂ ਦਾ ਨਜ਼ਰੀਆ ਜ਼ਿਆਦਾ ਰਵਾਇਤੀ ਹੈ। ਇਸੇ ਲਈ ਅਜ਼ਾਦੀ ਤੋਂ ਬਾਅਦ ਕਦੇ ਕਿਸੇ ਨੇ ਵੀ ਦੋ ਭਾਈਚਾਰਿਆਂ ਵਿਚ ਅਜਿਹੀ ਟਕਰਾਅ ਦੀ ਗੱਲ ਨਹੀਂ ਸੁਣੀ। ਇਹ ਹਮਲੇ 2024 ਤਕ ਹੋਰ ਵਧਣਗੇ ਜਿਵੇਂ ਕਿ ਮਨੀਪੁਰ ਵਿਚ ਦੇਖਿਆ ਗਿਆ ਹੈ’।

ਪ੍ਰੋਗਰਾਮ ਵਿਚ ਸ਼ਾਮਲ ਹੋਏ ਲੋਕਾਂ ਨੇ ਦੇਸ਼ ਦੇ ਵੱਖ-ਵੱਖ ਤੀਰਥ ਸਥਾਨਾਂ ’ਤੇ ਸੁਰੱਖਿਆ ਵਧਾਉਣ ਦੀ ਮੰਗ ਵੀ ਉਠਾਈ। ਉਨ੍ਹਾਂ ਨੂੰ ਡਰ ਹੈ ਕਿ ਆਉਣ ਵਾਲੀਆਂ ਲੋਕ ਸਭਾ ਚੋਣਾਂ ਤੋਂ ਪਹਿਲਾਂ ਅਯੁੱਧਿਆ ‘ਚ ਨਿਰਮਾਣ ਅਧੀਨ ਰਾਮ ਮੰਦਰ ਜਾਂ ਭਾਰਤ ਦੇ ਕਿਸੇ ਹੋਰ ਵੱਡੇ ਮੰਦਰ ‘ਤੇ ਹਮਲਾ ਕੀਤਾ ਜਾ ਸਕਦਾ ਹੈ। ਮਲਿਕ ਨੇ ਕਿਹਾ, “ਸਰਕਾਰ ਲੋਕਾਂ ਦਾ ਧਰੁਵੀਕਰਨ ਕਰਨ ਅਤੇ ਚੋਣਾਂ ਜਿੱਤਣ ਲਈ ਅਜਿਹਾ ਕਰ ਸਕਦੀ ਹੈ”। ਉਨ੍ਹਾਂ ਕਿਹਾ ਕਿ ਅਲ-ਕਾਇਦਾ ਦੀ ਰਾਮ ਮੰਦਰ ਨੂੰ ਉਡਾਉਣ ਦੀ ਕਥਿਤ ਧਮਕੀ ਨੂੰ ਗੰਭੀਰਤਾ ਨਾਲ ਲਿਆ ਜਾਣਾ ਚਾਹੀਦਾ ਹੈ। ਪ੍ਰੋਗਰਾਮ ਨੂੰ ਸੰਸਦ ਮੈਂਬਰ ਦਿਗਵਿਜੇ ਸਿੰਘ, ਦਾਨਿਸ਼ ਅਲੀ, ਕੁਮਾਰ ਕੇਤਕਰ, ਜੌਹਨ ਬ੍ਰਿਟਸ ਅਤੇ ਵਕੀਲ ਪ੍ਰਸ਼ਾਂਤ ਭੂਸ਼ਣ ਨੇ ਸੰਬੋਧਨ ਕੀਤਾ।

ਮਲਿਕ ਨੇ ਕਿਹਾ ਕਿ 2024 ‘ਚ ਵੀ ਅਜਿਹੀ ਕੋਈ ਯੋਜਨਾ ਬਣਾਈ ਜਾ ਸਕਦੀ ਹੈ। ਉਨ੍ਹਾਂ ਕਿਹਾ, ‘ਉਹ ਭਾਜਪਾ ਦੇ ਕਿਸੇ ਪ੍ਰਮੁੱਖ ਨੇਤਾ ਨੂੰ ਮਾਰ ਸਕਦੇ ਹਨ ਜਾਂ ਰਾਮ ਮੰਦਰ ‘ਤੇ ਬੰਬ ਸੁੱਟ ਸਕਦੇ ਹਨ। ਅਜੀਤ ਡੋਵਾਲ (ਰਾਸ਼ਟਰੀ ਸੁਰੱਖਿਆ ਸਲਾਹਕਾਰ) ਇਨ੍ਹੀਂ ਦਿਨੀਂ ਯੂ.ਏ.ਈ. ਦਾ ਦੌਰਾ ਕਿਉਂ ਕਰ ਰਹੇ ਹਨ? ਉਹ ਉਥੋਂ ਦੇ ਸ਼ਾਸਕਾਂ ਤੋਂ ਸਮਰਥਨ ਇਕੱਠਾ ਕਰ ਰਿਹਾ ਹੈ ਤਾਂ ਜੋ ਪਾਕਿਸਤਾਨੀਆਂ ‘ਤੇ ਦਬਾਅ ਬਣਾਇਆ ਜਾ ਸਕੇ ਕਿ ਜਦੋਂ ਸਾਡੀ ਫ਼ੌਜ ਪਾਕਿਸਤਾਨ ਦੇ ਕਬਜ਼ੇ ਵਾਲੇ ਕਸ਼ਮੀਰ ਵਿਚ ਦਾਖਲ ਹੁੰਦੀ ਹੈ ਤਾਂ ਉਹ ਜਵਾਬੀ ਕਾਰਵਾਈ ਨਾ ਕਰਨ। ਉਹ ਕੁੱਝ ਦਿਨ ਉਥੇ ਰਹਿਣਗੇ ਅਤੇ ਵਾਪਸ ਆਉਣ ’ਤੇ ਚੋਣ ਜਿੱਤਣ ਦੀ ਉਮੀਦ ਕਰਨਗੇ। ਲੋਕਾਂ ਨੂੰ ਪਤਾ ਹੋਣਾ ਚਾਹੀਦਾ ਹੈ ਕਿ ਉਹ ਕੀ ਕਰ ਰਹੇ ਹਨ”।