ਡਾਰਕਨੈੱਟ ’ਤੇ ਚੱਲ ਰਹੇ “ਸੱਭ ਤੋਂ ਵੱਡੇ” ਨਸ਼ਾ ਤਸਕਰੀ ਸਿੰਡੀਕੇਟ ਦਾ ਪਰਦਾਫਾਸ਼; NCB ਨੇ ਤਿੰਨ ਲੋਕਾਂ ਨੂੰ ਕੀਤਾ ਗ੍ਰਿਫ਼ਤਾਰ
ਨਵੀਂ ਦਿੱਲੀ: ਨਾਰਕੋਟਿਕਸ ਕੰਟਰੋਲ ਬਿਊਰੋ (ਐਨ.ਸੀ.ਬੀ.) ਨੇ ਭਾਰਤ ਵਿਚ ‘ਡਾਰਕਨੈੱਟ’ ‘ਤੇ ਕੰਮ ਕਰ ਰਹੇ ‘ਸੱਭ ਤੋਂ ਵੱਡੇ’ ‘ਐਲ.ਐਸ.ਡੀ.’ ਸਿੰਡੀਕੇਟ ਦਾ ਪਰਦਾਫਾਸ਼ ਕਰਨ ਦਾ ਦਾਅਵਾ ਕੀਤਾ ਹੈ। ਇਸ ਦੌਰਾਨ 13,000 ਤੋਂ ਵੱਧ ‘ਬਲੌਟਸ’, 26 ਲੱਖ ਰੁਪਏ ਦੀ ਨਕਦੀ ਜ਼ਬਤ ਕਰ ਕੇ ਤਿੰਨ ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਹੈ। ਇਸ ਸਬੰਧੀ ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨੇ ਟਵੀਟ ਜ਼ਰੀਏ ਵੀ ਜਾਣਕਾਰੀ ਸਾਂਝੀ ਕੀਤੀ ਹੈ।
ਦੋ ਮਹੀਨੇ ਪਹਿਲਾਂ ਜੂਨ ਵਿਚ, ਏਜੰਸੀ ਨੇ 15,000 ਐਲ.ਐਸ.ਡੀ. ਬਲੌਟ ਜ਼ਬਤ ਕਰਨ ਤੋਂ ਬਾਅਦ ਅੱਧੀ ਦਰਜਨ ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਸੀ। ਉਨ੍ਹਾਂ ਦਸਿਆ ਕਿ ਆਪਰੇਸ਼ਨ ਦੌਰਾਨ ਪਤਾ ਲੱਗਿਆ ਕਿ ‘ਡਾਰਕਨੈੱਟ’ ‘ਤੇ ਕੰਮ ਕਰਨ ਵਾਲਾ ‘ਐਲ.ਐਸ.ਡੀ.’ ਗਰੁੱਪ ਜੰਬਾਡਾ ਦਿੱਲੀ-ਐਨ.ਸੀ.ਆਰ. ਤੋਂ ਕੰਮ ਕਰਦਾ ਹੈ। ਉਨ੍ਹਾਂ ਕਿਹਾ ਕਿ ਤਕਨੀਕੀ ਅਤੇ ਮਨੁੱਖੀ ਨਿਗਰਾਨੀ ਰਾਹੀਂ ਇਸ ਗਰੋਹ ਨਾਲ ਜੁੜੇ ਦੋ ਵਿਅਕਤੀਆਂ ਦੀ ਪਛਾਣ ਕੀਤੀ ਗਈ ਅਤੇ ਇਸ ਨਾਲ ਇਸ ਗਰੋਹ ਦਾ ‘ਮਾਸਟਰਮਾਈਂਡ’ ਫੜਿਆ ਗਿਆ, ਜੋ ਕਿ ਹਰਿਆਣਾ ਦੇ ਬੱਲਭਗੜ੍ਹ (ਫਰੀਦਾਬਾਦ) ਤੋਂ ਕੰਮ ਕਰ ਰਿਹਾ ਸੀ।
ਕੀ ਹੈ ਐਲ.ਐਸ.ਡੀ.?
ਐਲ.ਐਸ.ਡੀ. ਜਾਂ ‘ਲਾਈਸਰਜਿਕ ਐਸਿਡ ਡਾਇਥਾਈਲਾਮਾਈਡ’ ਇਕ ਸਿੰਥੈਟਿਕ ਰਸਾਇਣ ਅਧਾਰਤ ਨਸ਼ੀਲਾ ਪਦਾਰਥ ਹੈ। ਨੌਜਵਾਨਾਂ ਦੁਆਰਾ ਇਸ ਦੀ ਵੱਡੇ ਪਧਰ ‘ਤੇ ਵਰਤੋਂ ਕੀਤੀ ਜਾਂਦੀ ਹੈ ਅਤੇ ਇਸ ਦੇ ਸੇਵਨ ਨਾਲ ਗੰਭੀਰ ਸਿਹਤ ਸਮੱਸਿਆਵਾਂ ਹੋ ਸਕਦੀਆਂ ਹਨ। ਇਸ ਦਾ ਸੇਵਰ ਕਾਗਜ਼ ਦੇ ਛੋਟੇ ਟੁਕੜਿਆਂ (ਬਲੌਟ) ‘ਤੇ ਲਗਾ ਕੇ ਕੀਤਾ ਜਾਂਦਾ ਹੈ।
‘ਡਾਰਕਨੈੱਟ‘ ਕੀ ਹੈ?
‘ਡਾਰਕਨੈੱਟ’ ਇਕ ਗੁਪਤ ਇੰਟਰਨੈਟ ਪਲੇਟਫਾਰਮ ਹੈ ਜੋ ਨਸ਼ੀਲੇ ਪਦਾਰਥਾਂ ਦੀ ਵਿਕਰੀ, ਅਸ਼ਲੀਲ ਸਮੱਗਰੀ ਦੇ ਆਦਾਨ-ਪ੍ਰਦਾਨ ਅਤੇ ਹੋਰ ਗੈਰ-ਕਾਨੂੰਨੀ ਗਤੀਵਿਧੀਆਂ ਵਿਚ ਕਾਨੂੰਨ ਲਾਗੂ ਕਰਨ ਵਾਲੀਆਂ ਏਜੰਸੀਆਂ ਦੁਆਰਾ ਨਿਗਰਾਨੀ ਤੋਂ ਬਚਣ ਲਈ ਵਰਤਿਆ ਜਾਂਦਾ ਹੈ।