ਏਜੰਟ ਦੀ ਧੋਖਾਧੜੀ ਕਾਰਨ ਪੁਰਤਗਾਲ ਵਿਚ ਨੌਜਵਾਨ ਦੀ ਮੌਤ, 3 ਧੀਆਂ ਦੇ ਸਿਰ ਤੋਂ ਉੱਠਿਆ ਪਿਓ ਦਾ ਸਾਇਆ

ਪਿਹੋਵਾ: ਏਜੰਟ ਦੀ ਧੋਖਾਧੜੀ ਕਾਰਨ ਹਰਿਆਣਾ ਦੇ ਪਿਹੋਵਾ ਨਾਲ ਸਬੰਧਤ ਇਕ ਨੌਜਵਾਨ ਦੀ ਵਿਦੇਸ਼ ਵਿਚ ਮੌਤ ਹੋ ਗਈ। ਪ੍ਰਵਾਰ ਨੇ ਖਦਸ਼ਾ ਜਤਾਇਆ ਹੈ ਕਿ ਉਨ੍ਹਾਂ ਦੇ ਪੁੱਤਰ ਦਾ ਕਤਲ ਕੀਤਾ ਗਿਆ ਹੈ। ਮ੍ਰਿਤਕ ਦੀ ਪਛਾਣ ਪਰਦੀਪ ਕੁਮਾਰ ਵਜੋਂ ਹੋਈ ਹੈ, ਉਹ ਅਪਣੇ ਪਿੱਛੇ 3 ਧੀਆਂ, ਪਤਨੀ ਅਤੇ ਮਾਤਾ-ਪਿਤਾ ਨੂੰ ਛੱਡ ਗਿਆ ਹੈ। ਕਰੀਬ ਇਕ ਸਾਲ ਬਾਅਦ ਮ੍ਰਿਤਕ ਦੀ ਦੇਹ ਭਾਰਤ ਪਹੁੰਚੀ, ਇਸ ਮੌਕੇ ਪੂਰਾ ਪ੍ਰਵਾਰ ਸਦਮੇ ਵਿਚ ਸੀ। ਪ੍ਰਵਾਰ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੇ ਲੜਕੇ ਨੇ ਪੁਰਤਗਾਲ ਜਾਣ ਲਈ ਏਜੰਟ ਨੂੰ 14 ਲੱਖ ਰੁਪਏ ਦਿਤੇ ਸਨ ਪਰ ਉਹ ਉਥੇ ਨਹੀਂ ਪਹੁੰਚ ਸਕਿਆ।

ਪ੍ਰਵਾਰ ਨੂੰ ਪਰਦੀਪ ਦੀ ਮੌਤ ਦੀ ਸੂਚਨਾ ਕਰੀਬ ਦੋ ਮਹੀਨੇ ਬਾਅਦ ਉਸ ਦੇ ਸਾਥੀਆਂ ਨੇ ਦਿਤੀ ਸੀ। ਇਸ ਮਗਰੋਂ ਏਜੰਟ ਨਾਲ ਗੱਲ ਵੀ ਕੀਤੀ ਗਈ ਪਰ ਉਹ ਭਰੋਸਾ ਦਿੰਦਾ ਰਿਹਾ ਕਿ ਪਰਦੀਪ ਬਿਲਕੁਲ ਠੀਕ ਹੈ, ਏਜੰਟ ਨੇ ਪ੍ਰਵਾਰ ਨੂੰ ਕਾਫੀ ਸਮੇਂ ਤਕ ਗੁੰਮਰਾਹ ਕੀਤਾ।  ਕਾਫੀ ਕੋਸ਼ਿਸ਼ਾਂ ਤੋਂ ਬਾਅਦ ਪ੍ਰਵਾਰ ਨੇ ਸਥਾਨਕ ਅਧਿਕਾਰੀਆਂ ਨਾਲ ਈ-ਮੇਲ ਜ਼ਰੀਏ ਸੰਪਰਕ ਕੀਤਾ ਅਤੇ ਪਰਦੀਪ ਸਬੰਧੀ ਜਾਣਕਾਰੀ ਸਾਂਝੀ ਕਰਨ ਦੀ ਅਪੀਲ ਕੀਤੀ ਸੀ। ਇਸ ਤੋਂ ਬਾਅਦ ਸਥਾਨਕ ਪੁਲਿਸ ਨੇ ਜੰਗਲਾਂ ਵਿਚੋਂ ਉਸ ਦੀ ਲਾਸ਼ ਬਰਾਮਦ ਕੀਤੀ ਅਤੇ ਪ੍ਰਵਾਰ ਨੂੰ ਸੂਚਨਾ ਦਿਤੀ। ਪ੍ਰਵਾਰ ਨੇ ਦਸਿਆ ਕਿ ਉਨ੍ਹਾਂ ਨੇ ਇਥੇ ਪੁਲਿਸ ਨੂੰ ਸ਼ਿਕਾਇਤ ਵੀ ਦਿਤੀ ਗਈ ਪਰ ਪ੍ਰਸ਼ਾਸਨ ਨੇ ਏਜੰਟ ਵਿਰੁਧ ਕੋਈ ਕਾਰਵਾਈ ਨਹੀਂ ਕੀਤੀ। ਇਸ ਦੀ ਬਜਾਏ ਪੁਲਿਸ ਨੇ ਪ੍ਰਵਾਰ ਨੂੰ ਧਮਕੀਆਂ ਵੀ ਦਿਤੀਆਂ।