ਬਿਜਲੀ ਦੀ ਮਾੜੀ ਵਿਵਸਥਾ ਨੇ ਲੋਕਾਂ ਦੀ ਜ਼ਿੰਦਗੀ ਦੀ ਰਫ਼ਤਾਰ ਰੋਕੀ, ਪਾਣੀ ਤੱਕ ਉਪਲਬਧ ਨਹੀਂ : ਡਾ. ਸਲਾਰੀਆ

ਪਠਾਨਕੋਟ/ਭੋਆ –ਬੀਤੀ ਰਾਤ ਆਏ ਤੇਜ਼ ਹਨੇਰੀ-ਤੂਫ਼ਾਨ ਅਤੇ ਮੂਸਲਾਧਾਰ ਬਾਰਿਸ਼ ਤੋਂ ਬਾਅਦ ਇਲਾਕੇ ਵਿੱਚ ਬਿਜਲੀ ਸਪਲਾਈ ਪੂਰੀ ਤਰ੍ਹਾਂ ਠੱਪ ਹੋ ਗਈ। 12 ਘੰਟਿਆਂ ਬਾਅਦ ਵੀ ਬਿਜਲੀ ਦੀ ਬਹਾਲੀ ਨਾ ਹੋਣ ਕਰਕੇ ਆਮ ਜਨਤਾ ਦਾ ਜੀਵਨ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੈ। ਘਰਾਂ ਵਿੱਚ ਮੋਟਰਾਂ ਰਾਹੀਂ ਜਲ ਸਪਲਾਈ ਹੁੰਦੀ ਹੈ ਜੋ ਬਿਜਲੀ ’ਤੇ ਨਿਰਭਰ ਹੈ, ਇਸ ਲਈ ਪੀਣ ਤੋਂ ਲੈ ਕੇ ਨਹਾਉਣ ਤੱਕ ਲਈ ਪਾਣੀ ਉਪਲਬਧ ਨਹੀਂ।
ਇਸ ਗੰਭੀਰ ਸਮੱਸਿਆ ’ਤੇ ਅੰਤਰਰਾਸ਼ਟਰੀ ਸਮਾਜ ਸੇਵੀ ਸੰਸਥਾ ‘ਪੀ.ਸੀ.ਟੀ. ਹਿਊਮੈਨਿਟੀ’ ਦੇ ਸੰਸਥਾਪਕ ਡਾ. ਜੋਗਿੰਦਰ ਸਿੰਘ ਸਲਾਰੀਆ ਨੇ ਪੰਜਾਬ ਸਰਕਾਰ ਅਤੇ ਬਿਜਲੀ ਵਿਭਾਗ ਦੀ ਕਾਰਗੁਜ਼ਾਰੀ ’ਤੇ ਗੰਭੀਰ ਸਵਾਲ ਖੜ੍ਹੇ ਕੀਤੇ ਹਨ। ਉਨ੍ਹਾਂ ਕਿਹਾ ਕਿ ਪਿਛਲੇ 70–80 ਸਾਲਾਂ ਤੋਂ ਹਰ ਮੰਗਲਵਾਰ ਨੂੰ “ਮੈਂਟੇਨੈਂਸ ਡੇ” ਦੇ ਨਾਂ ’ਤੇ ਲੋਕਾਂ ਨੂੰ ਪਰੇਸ਼ਾਨ ਕੀਤਾ ਜਾ ਰਿਹਾ ਹੈ। ਜਦੋਂ ਹਫ਼ਤਾਵਾਰੀ ਮੁਰੰਮਤ ਹੁੰਦੀ ਹੈ ਤਾਂ ਫਿਰ ਥੋੜ੍ਹੀ ਜਿਹੀ ਹਨੇਰੀ ਜਾਂ ਤੂਫ਼ਾਨ ਨਾਲ ਹੀ ਬਿਜਲੀ ਘੰਟਿਆਂ ਜਾਂ ਪੂਰੇ ਦਿਨ ਲਈ ਕਿਉਂ ਗੁੱਲ ਹੋ ਜਾਂਦੀ ਹੈ? ਕੀ ਸਰਕਾਰ ਅਤੇ ਵਿਭਾਗ ਵਾਸਤਵ ਵਿੱਚ ਆਪਣੀ ਜ਼ਿੰਮੇਵਾਰੀ ਨਿਭਾ ਰਹੇ ਹਨ?
ਡਾ. ਸਲਾਰੀਆ ਨੇ ਕਿਹਾ ਕਿ ਬਿਜਲੀ ਅਤੇ ਪਾਣੀ ਆਮ ਜਨ ਜੀਵਨ ਦੀ ਰੀੜ੍ਹ ਦੀ ਹੱਡੀ ਹਨ। ਬਿਜਲੀ ਗੁੱਲ ਹੋਣ ਕਰਕੇ ਮੋਟਰਾਂ ਤੇ ਟੈਂਕੀਆਂ ਬੰਦ ਹਨ, ਬੱਚੇ ਸਕੂਲ ਨਹੀਂ ਜਾ ਸਕਦੇ, ਨੌਕਰੀਪੇਸ਼ਾ ਲੋਕ ਦਫ਼ਤਰਾਂ ’ਚ ਨਹੀਂ ਪਹੁੰਚ ਸਕਦੇ ਅਤੇ ਪਿੰਡਾਂ ਵਿੱਚ ਮਾਲ-ਡੰਗਰ ਦੀ ਸੰਭਾਲ ਵੀ ਠੱਪ ਹੋ ਜਾਂਦੀ ਹੈ। ਲੋਕਾਂ ਦਾ ਕਹਿਣਾ ਹੈ ਕਿ ਉਹ “ਗ਼ੁਲਾਮੀ ਵਰਗਾ ਜੀਵਨ ਜੀਣ ਲਈ ਮਜਬੂਰ ਹਨ – ਨਾ ਪਾਣੀ, ਨਾ ਪੱਖਾ, ਨਾ ਮੋਬਾਈਲ ਚਾਰਜਿੰਗ, ਸਭ ਕੁਝ ਰੁਕ ਗਿਆ ਹੈ।”
ਉਨ੍ਹਾਂ ਦੱਸਿਆ ਕਿ ਤੂਫ਼ਾਨ ਦੌਰਾਨ ਕਈ ਥਾਵਾਂ ’ਤੇ ਦਰੱਖਤ ਬਿਜਲੀ ਦੀਆਂ ਲਾਈਨਾਂ ’ਤੇ ਡਿੱਗ ਗਏ ਜਿਸ ਕਾਰਨ ਸਪਲਾਈ ਬੰਦ ਹੋ ਗਈ। ਬਿਜਲੀ ਵਿਭਾਗ ਦੇ ਨਾਲ-ਨਾਲ ਜੰਗਲਾਤ ਤੇ ਨਹਿਰੀ ਵਿਭਾਗ ਵੀ ਇਸ ਹਾਲਤ ਲਈ ਬਰਾਬਰ ਜ਼ਿੰਮੇਵਾਰ ਹਨ ਕਿਉਂਕਿ ਬਿਜਲੀ ਲਾਈਨਾਂ ਦੇ ਨੇੜੇ ਦਰੱਖਤਾਂ ਦੀ ਕਟਾਈ ਅਤੇ ਛੰਗਾਈ ਨਾ ਹੋਣ ਕਾਰਨ ਹਰ ਵਾਰ ਇਹ ਸਮੱਸਿਆ ਦੁਹਰਾਈ ਜਾਂਦੀ ਹੈ।
ਡਾ. ਸਲਾਰੀਆ ਨੇ ਜ਼ੋਰ ਦਿੱਤਾ ਕਿ ਸਿਰਫ਼ ਸਰਕਾਰ ਹੀ ਨਹੀਂ, ਆਮ ਲੋਕਾਂ ਨੂੰ ਵੀ ਆਪਣੀ ਜ਼ਿੰਮੇਵਾਰੀ ਨਿਭਾਉਣੀ ਪਵੇਗੀ। ਜਿੱਥੇ ਵੀ ਬਿਜਲੀ ਲਾਈਨਾਂ ਖੇਤਾਂ ਵਿੱਚੋਂ ਗੁਜ਼ਰਦੀਆਂ ਹਨ, ਕਿਸਾਨਾਂ ਨੂੰ ਆਪ ਹੀ ਦਰੱਖਤਾਂ ਦੀ ਛੰਗਾਈ ਕਰਵਾਉਣੀ ਚਾਹੀਦੀ ਹੈ ਤਾਂ ਜੋ ਤਾਰਾਂ ’ਤੇ ਦਰੱਖਤ ਡਿੱਗਣ ਜਾਂ ਸ਼ਾਰਟ ਸਰਕਟ ਵਰਗੀਆਂ ਘਟਨਾਵਾਂ ਤੋਂ ਬਚਿਆ ਜਾ ਸਕੇ।
ਉਨ੍ਹਾਂ ਕਿਹਾ ਕਿ ਧਰਨਿਆਂ ਅਤੇ ਵਿਰੋਧਾਂ ਦੀ ਬਜਾਏ ਹੱਲ ਵੱਲ ਵਧਣ ਦੀ ਲੋੜ ਹੈ। ਜੇ ਬਿਜਲੀ ਲਾਈਨਾਂ ਦੇ ਨੇੜੇ ਦਰੱਖਤ ਸਮੇਂ ਸਿਰ ਕਟਵਾਏ ਜਾਣ ਤਾਂ ਬਿਜਲੀ ਸਪਲਾਈ ਠੱਪ ਹੋਣ ਦੀ ਸੰਭਾਵਨਾ ਕਾਫ਼ੀ ਹੱਦ ਤੱਕ ਘਟ ਜਾਵੇਗੀ।
ਸਲਾਰੀਆ ਨੇ ਪੁੱਛਿਆ ਕਿ ਜੇ ਹਰ ਹਫ਼ਤੇ ਮੈਂਟੇਨੈਂਸ ਡੇ ਦੇ ਨਾਂ ’ਤੇ ਬਿਜਲੀ ਕੱਟੀ ਜਾਂਦੀ ਹੈ ਤਾਂ ਫਿਰ ਵੀ ਅਣਐਲਾਨੇ ਕੱਟ ਕਿਉਂ ਲੱਗ ਰਹੇ ਹਨ? ਇਸ ਦਾ ਅਰਥ ਹੈ ਕਿ ਕੰਮ ਢੰਗ ਨਾਲ ਨਹੀਂ ਹੋ ਰਿਹਾ।
ਸਭ ਤੋਂ ਵੱਡੀ ਸਮੱਸਿਆ ਪਾਣੀ ਦੀ ਹੈ। ਜਿਵੇਂ ਹੀ ਬਿਜਲੀ ਜਾਂਦੀ ਹੈ, ਘਰਾਂ ਦੀਆਂ ਟੈਂਕੀਆਂ ਖ਼ਾਲੀ ਹੋ ਜਾਂਦੀਆਂ ਹਨ। ਬੱਚਿਆਂ ਦੀਆਂ ਮਾਵਾਂ ਚਿੰਤਾ ਵਿੱਚ ਪੈ ਜਾਂਦੀਆਂ ਹਨ, ਨੌਕਰੀਪੇਸ਼ਾ ਲੋਕ ਇਕ ਬਾਲਟੀ ਪਾਣੀ ਲਈ ਤਰਸਦੇ ਹਨ।
ਡਾ. ਸਲਾਰੀਆ ਨੇ ਮੰਗ ਕੀਤੀ ਕਿ ਬਿਜਲੀ ਸਪਲਾਈ ਨੂੰ ਤੁਰੰਤ ਬਹਾਲ ਕੀਤਾ ਜਾਵੇ ਅਤੇ ਭਵਿੱਖ ਵਿੱਚ ਐਸੀਆਂ ਘਟਨਾਵਾਂ ਦੀ ਦੁਹਰਾਈ ਨਾ ਹੋਵੇ। ਉਨ੍ਹਾਂ ਕਿਹਾ – “ਬਿਜਲੀ ਸਿਰਫ਼ ਸਹੂਲਤ ਨਹੀਂ, ਅੱਜ ਇਹ ਜੀਵਨ ਦਾ ਅਟੁੱਟ ਹਿੱਸਾ ਹੈ। ਬਿਜਲੀ ਬਿਨਾਂ ਇਕ ਪਲ ਵੀ ਰੁਕਣਾ ਮੁਸ਼ਕਲ ਹੈ।”
ਉਨ੍ਹਾਂ ਚੇਤਾਵਨੀ ਦਿੱਤੀ ਕਿ ਜੇ ਸਰਕਾਰ, ਬਿਜਲੀ ਵਿਭਾਗ ਅਤੇ ਸਮਾਜ ਨੇ ਮਿਲ ਕੇ ਇਸ ਦਾ ਸਥਾਈ ਹੱਲ ਨਾ ਲੱਭਿਆ ਤਾਂ ਹਰ ਬਾਰਿਸ਼ ਅਤੇ ਹਨੇਰੀ ਤੋਂ ਬਾਅਦ ਲੋਕਾਂ ਨੂੰ ਇਹੀ ਤ੍ਰਾਸਦੀ ਵਾਪਰਦੀ ਰਹੇਗੀ।